La carta de la guingueta ciutadana

Las annadas 2020 an vist lo retorn deu "concèpte" de guingueta. Ligat, solide, au besonh de hèr amassa en tot se díser "e perdequé pas hestajar meslèu que non pas quicòm mès ?

​

Las guinguetas son a la mòda. Aquestes lòcs navèths hestius e populars, que's tròban devath lo cèu, investissen sovent las ribas de lacs o rius. Se parla atau de "l'esperit guingueta", qu'emboha un vent de libertat e de gaujor dens aqueste periòde drin sorne.

​

Es atau que's pòt compénguer l'arribada de la guingueta de Tornahuelha. Es eishuda de l'Agora, (amassada ciutadana consultativa de la vila), e representa una de las purmèras produccions ciutadanas neishudas de la volontat de sons sòcis. Aquesta amassada, creada en 2020, a volgut, au demiei de sas purmèras soscadissas, botar en plaça una animacion estivenca e hestiva que necessitèc lo biaish de hèr de cadun. Una associacion estoc lavetz creada e estoc la debuta d'una beròia aventura…

 

Una guingueta a Tornahuelha, òc, mais pas quin que sia !

L'ensems deus sòcis de l'associacion partajan un medish esperit, una etica e valors comunas que viran a l'entorn de tres dimensions diferentas e complementàrias.

​

1. Reconéisher lo benevolat e la democracia com fondament de la vida de l'associacion "la Guingueta de Tornahuelha".

Los participants de las accions de la guingueta reconeishen l'engatjament liure e volontari com motor de la vida associativa. Son d'acòrdi de botar tot en òbra per facilitar, encoratjar, lo ligam sociau e lo desvolopament deu territòri tornahuelhés.

​

Los signataris s'engatjan:

• a promòver lo respècte deus principis de non-descriminacion de las personas dens l'engatjament associatiu

• a favorizar las fòrmas d'implicacion collectiva

• a perméter a totis d'exerçar lor ciutadanetat

• a favorizar la complementaritat de las ressorças umanas

• a promòver la participacion egala de las hemnas e deus òmis a la gestion

• a trobar l'equilibri entre las generacions e los mitans socioculturaus

• a recercar l'equitat dens l'exercici de las resposabilitat.

Los participants encoratjan la promocion de l'experiéncia associativa au perhons de nòsta societat e la valorizacion deus aquesits deus benevòles, deus salariats e de totis los actors de l'associacion.

​

2. Afortir l'enveja collectiva, qu'es aquò ?

Per nosautes, a la Guingueta, s'agís de prénguer au seriós lo besonh antropologic de hèsta ! 

La hèsta es un element essenciau de fondament e d'afortida deu ligam dens las societats umanas.

Mes las hèstas que son tanben dispositius plan organizats, constrenhuts dens nòrmas e règlas, e es pas question aquí de hèr qué que sia. En efèit, es pas desconectada de la vida sociala ordinària, n'es una de las fòrmas possiblas.

​

A la Guingueta de Tornahuelha volèm :

• Que sia acompanhda d'activitats ludicas, creativas e d'un ensems de regaudidas de totas.

• Que shisclen las idèas sus biaish navèths de's divertir, es aquste poder creatiu au servici de la hèsta que perpausam de desvolopar a Tornahuelha.

• Desiram hèr deu vam hestiu un levader de desvolopament sociau locau, tan economic que non pas culturaul.

• Volèm hèr atau qu'aquestes moments partatjats se càmbien en entrajuda, e perdequé pas en relacions socialas mès perennas.

 

3. Desvolopar l'espaci public ciutadan e solidari per valorizar la convivéncia e afortir l'integracion dens la vila.

Mantunas societats se demandan com assegurar l'armonia e la coesion sociala, es a díser una milhora convivéncia. Aquesta nocion arribèc i a unas annadas, dens un contèxte on son apareishudas fòrmas navèras de diversitat coma l'urbanizacion, la creishença urbana, la mobilitat internacionala, etc . Es ligada a uns compausants com la reconeishença de las diferéncias, de la non-violéncia, de la luta contra las hòrabandidas, de la recèrca deu consens…

La Guingueta de Tornahuelha es meslèu una organizacion de natura orizontala e desiram que :

• Constituisca atau un poder collectiu on las relacions socialas e partenarialas s'i bastissen per l'escota, lo dialògue, e peu respècte deus engatjaments, deus ròtles e de las foncion de cadun.

• Se situe dens aquesta bastida de l'espaci public ciutadan o çò que'ns inspira es una etica que respècta l'uman, que permet a las personas de partatjar temps entre amics, de charrar dambe los vesins, de s'encontrar a d'autes moments e desvolopar los hialats de sociabilitat sus la comuna e endacòm mès.

Que'ns permeta de milhorar la coesion sociala, la convivéncia entre grops diferents, l'inclusion de navèths arribants e las autas comunautats, la luta contra las discriminacions, la seguretat urbana.